அவரவருக்குப் பிடித்தது

அவரவருக்குப்  பிடித்தது
மகான்களுக்கு தர்மோபதேசம்
சபாக்காரர்களுக்குக் கீதோபதேசம்
அவருக்கு சித்தாந்தம்
இவருக்கு வேதாந்தம்
பெரியவருக்கு ஞானோபதேசம்
சிறியவருக்கு பிரம்மோபதேசம்
அவளுக்குப் பட்டுப்புடைவை
இவளுக்கு இரட்டைவடச் சங்கிலி
மாடர்ன் கட்டிங் மாடர்ன் டிஸைன்
சில பெண்மணிகளுக்குப்
பெண் விடுதலை
சில மகளிருக்கு கூடிவிட்ட
எடையிலிருந்து விடுதலை நல்கும் ஜிம்
எனக்குப் பிடித்தது?
எனக்குப் பிடித்தது
எப்போதுமே அக்கார வடிசலில்
அதிக நெய்
மிளகுப் பொங்கலில்
பட்டரின் கைமணம்
பிரசாதம் வாங்கிய
கையோடு திரும்பிப் பார்த்துக்
கண்ணோட்டமிடுவது
மேற்குறித்த எல்லோருமே
டயட் கட்டுப்பாட்டையும்
சற்றே ஒத்தி வைத்து
வரிசையில் நிற்கக் காண்பது.
எல்லோரும் ஓர் நிறை
எல்லோரும் பெருமாள் கோயில்
பிரசாதத்தின் பக்தர்கள்.
தாமின்புறுவது உலகின்புறக்
கண்டுக் காமுறுவது
கற்றறிந்தார் வழக்கம்

காதலென்பதோர் மாருதம்

காதலென்பதோர் மாருதம்
காதலென்பதோர் மாருதம் வீசவும்
காதலென்பதோர் மாருதம் வீசவும்
மோகமென்பதோர்  மணியோசை நடுங்க
நடப்பது  காணச் சாளரம் திறந்தாள்
திலகமிட்டு மையெழுதியத் திருமுகவல்லி.
தொழுது நின்றான் கைகூப்பி
எழுநிலை மாடத்தின் கீழ்ப்  புது மணவாளன்
உதிக்கும்  திருநாளின் திரைவிலக்கி,
உயரும்  கதிரவன் எதிரே.
தொழுகை எனக்கே என
புருவம் நெரித்தாள் முறுவல் மறைத்து.
பொன்கிரணம் பூசிய மஞ்சம் காட்டிக்
கண்ணிமைகள் சிமிட்டினான் காதலன் 

விரல்களின் விதி

விரல்களின் விதி
 1
கதவருகில் சுவர் மீது
காலிங் பெல் ஸ்விட்ச்
இருந்துவிட்டால் 
அதை அழுத்துவதற்கு
உலகின் எல்லா விரல்களுக்கும்
உரிமை உண்டு
எவர் அழுத்தினாலும்
நாம் கதவைத் திறந்து
பொறுமையாய்ப் பதில்
சொல்லவேண்டிய
கட்டாயத்தில் இருக்கிறோம்
எவ்வளவு சலிப்பிருந்தாலும்
 2
எல்லா விரல்களுமே
மிக நல்ல வீணை தடவை
ஈசனெந்தை இணையடி நீழலில்
இளைப்பாற விரும்பும் என்பது
நான் அவ்வப்போது 
போடும் தப்புக்கணக்கு
உலகெங்கும் எல்லா விரல்களுமே
கரன்சி நோட்டுக்களைத்
தடவித்தடவி எண்ணுவதையே
மிகவும் காதலிக்கின்றன
காலிங் பெல்லை
அழுத்துவதைக் காட்டிலும்  அதிகமாய்
அப்போது காதலி?
அட போய்யா நீயும்
உன் காதலும் எனத் தூக்கிஎறிந்துவிட்டு
அவளும் அதையே விரும்புவாள்

வெள்ளை எலிகள் .. ஒரு சிறுமி.. நான்

வெள்ளை எலிகள் .. ஒரு சிறுமி.. நான் 
'வெள்ளை எலிகளை
நீ பார்த்திருக்கிறாயா நேரில்?'
அந்தச் சிறுமிக்குக் குறுமுயல் முகம்.
'இல்லை' என்றேன்.
பாவம் என்றாள்.
யார் ?
வெள்ளை எலிகள்.
ஏன்?
அவை அறிவியல் சோதனைக்காக
வளர்த்து அறுக்கப்படுவதை
நான் பார்த்தேன்.
எங்கே?
டிவியில்.
நீ அறுக்க மாட்டாயா?
மாட்டேன்.
கறுப்பு எலிகள்?
மாட்டேன்.
எந்த நிற எலிகளையும்
நான் அறுக்க மாட்டேன்.
அறிவியல் சோதனைகளையே
நடத்த முடியாதே!
முடியாவிட்டால் தான் என்ன?
நான் பதில் சொல்ல
இயலாத கேள்வி அது.
ஒருநாளைக்கு எலிகளே கிடைக்காவிட்டால்?
என்னையும் உன்னையும் வைத்து அறுப்பார்கள்.
ஏன்?
நீயும் நானும் வெளுப்பு

ஜனனீ ஜன்ம சௌக்யானாம்

தலையெழுத்து
ஜனனீ ஜன்ம சௌக்யானாம்
பதவீ பூர்வ புண்யானாம்
வர்த்தனீ குல சம்பதாம்
மணிநாதமாய் வருகிறது
புரோகிதர் நாவில் வாக்கு
உடல் வடிவம் பெற்று
உயிர் மடியில் குலுங்கிச் சிரிப்பதால்
பூரிக்கிறது அவர் மனம்.
தொடங்கியிருக்கிறது
 உயிரின் யாத்திரை ஒரு பெயரோடு
தலையெழுத்து என்று தடம்
அமைத்திருக்கிற தண்டவாளங்களில்
இனி ஓடவேண்டும் எல்லா அனுபவங்களும்
இந்திய ஞானம் பேரிட்டிருக்கிற   போக்குவழியில் .
மாற்றிக் காட்டுவேன் என்று தீரமாய் முனைந்தாலும்
அதுவும் தலையெழுத்துள் அடக்கம்
தண்டவாளம் அது வரை
போடப்பட்டிருக்கிறது என்கிறது வேதாந்தம்
அப்போது மீதி?
கார்ல் மார்க்ஸ்?
பொருள்முதல்வாதம்?
உலகத் தொழிலாளர் ஒற்றுமை?
அது அவரவர் தலையெழுத்து.

ஒற்றையடிப் பாதையான ஜீவநதி

ஒற்றையடிப் பாதையான ஜீவநதி
ஒற்றையடிப் பாதைகளாகி
ஒடுங்கி ஓடும்
ஜீவநதிகள் ஒரு நாள்
நாங்களும் சாக்கடைக் கால்வாய்கள்
புதைக்கும் சவக்குழிகளாகிவிடுவோம்
சம்மதமா என மௌனப் பார்வை பார்த்து
தலைகுனிந்து ஓடுகின்றன.
காமராமேன்களைக் கூப்பிட்டு
லொகேஷன் பார்த்து
காதல் காட்சிகளுக்கு
அவை ஒர்க் அவுட் ஆகுமா
என்று கணக்கிடும் தலைமுறையின்
கடைக்கோடியில் நிற்கும் நாம்
என்ன செய்வது?
வசனமோ பாட்டோ எழுத
வாய்ப்புக்கிடைக்குமா என்று
மேல் வானில் வட்டமிடும்
பருந்துக் கூட்டம் பார்த்துப்
பெருமூச்செறியலாம் .உச்சநீதிமன்றம்
பாராளு மன்றம் என முறையிட்டு
மனித உரிமைக் கமிஷன் போல்
நதி உரிமைக்கமிஷன் அமைக்க
மனுப்போடலாம், மாற்று இல்லை
என் கண்மணியே ஜீவ நதியே
நாங்கள் ஜனநாயக பகீரதர்கள்
தேர்தலுக்குக் காத்திருப்பவர்கள்
மன்னித்து விடுங்கள் !

உலகெங்கிலும் உள்ளஅழகிகள்

 உலகெங்கிலும் உள்ளஅழகிகள் 
உலகெங்கிலும் உள்ள ஒவ்வோர்
அழகி எதிர்ப்படும்போதெல்லாம்
நான் அவளைக் காதலிக்கத் தொடங்கிவிடுகிறேன்
மன்னியுங்கள் அல்லது மன்னிக்காதீர்கள் 
இது என் பலவீனம் .
இல்லை இது என் இயல்பு.
ஒவ்வொருத்தியும் ஒரு சுற்று
என் கவிதைச் சக்கரத்தைச்
சுற்றி விடுகிறாள்.
மறந்தே போவதில்லை
நான் அப்படிக் காதலித்துக் கொண்டே
போவதை அறியாத 
எல்லாவற்றையும் மன்னிக்கிற
எதையும் பொருட்படுத்தாத
ஒரு மனைவி எனக்கிருப்பதை!
பகவான் பார்த்துக்கொள்வார்
என்ற மகாவாக்கியம் அமுலில்
இருப்பது போல என் ஸ்டீயரிங்
அவள் கையில் அடக்கம் என்பதால்
நான் காதலித்துக்கொண்டே போகிறேன்
ஒவ்வொரு அழகியையும்.

ஆஹா எப்போது வரும் யுகப்புரட்சி?

ஆஹா எப்போது வரும் யுகப்புரட்சி?
அவர் துப்பாக்கி எடுக்கச் சொன்னார்;
இவர் அஹிம்சா பரமோ தர்மா
என்று உபதேச வாக்கியம் அருளி
ஜனநாயக சோஷலிசமாக மாற்ற முயன்றார் .
மற்றொருவர்  கையில்  'உருட்டடா உருட்டு '
என்ற ஞானோபதேச ஜபமாலை
மற்றொரு மகான் கஞ்சாச் சிலும்பியில்
சரணடையச் சொன்னார்.
சற்றுத்  தொலைவில் குழந்தை
பாலுக்கு அழுதது
இல்லறமல்லது நல்லறமல்லவெனச்
சான்றோர் இயம்பிய
வாக்கைப் பரிபாலிக்க
வீட்டு வாடகைக்கு
ஏற்பாடு செய்ய வேண்டியிருந்தது
ஆஹா எப்போது வரும் யுகப்புரட்சி
என உட்கார்ந்திருக்க முடியாத  
எழுத்துத் தொழிலாளி
நடந்தான் 'மீடியாக்ரிடி' பாதையில்

சக்கர வளையம்

சக்கர வளையம்
வந்து  விழுந்தது
வெள்ளக்குட்டையில்
சென்று நுழைந்தது
சௌகார்பேட்டையில்
நின்று  நிமிர்ந்தது
திருப்பத்தூரில்
சுயம் தேடித்
திரியும் யாத்திரை
எங்கோ தொடங்கி
எங்கெங்கோ திரிந்து
தேடிய  திசைகள்
சுற்றிச் சுழலும்
சக்கர வளையமே
ஒரே அச்சு
ஒரே இருசு
ஒரே வட்டம்.

ஹர ஹர நமப் பார்வதி பதயே

ஹர ஹர நமப் பார்வதி பதயே
தோண்ட ஆரம்பித்துவிட்டார்கள்
கல்லறைகளை, புதை குழிகளை,
அங்கம் அங்கமாகப் பிய்த்துப்பகுத்து 
பெரிய  அக்கப்போர்
இன்னினார் சாமுத்ரிகா லட்சணம்
இன்னின்ன விதம்
இன்னார் தமிழுக்கு இன்னின்ன அபராதம்
இயற்றினார், இவாள் பெரிய சீமான்,
அவாள் அளவுக்கு இல்லை என்றாலும்!
இப்படிப் போகிறது இலக்கிய விமர்சனம்
அன்று க.நா.சு. சொன்ன
'பற்றி இலக்கிய' பஜனை கோஷ்டி
தொடர்கிறது வேறு புள்ளிகள் பற்றி.
பஜனை தமிழர் பாரம்பரியச் சொத்து
தொடரவேண்டாமா தலைமுறை?.
ஹர ஹர நமப் பார்வதி பதயே