வேறுபாடுகளும் வித்தியாசங்களும்

வித்தியாசங்களும் வேறுபாடுகளும்
மனித நேயத்திற்கும்
வனித நேயத்திற்கும்
என்ன வித்தியாசம்?
வயசு வித்தியாசம்.
மனித உறவுக்கும்
புனித உறவுக்கும்
என்ன வேறுபாடு?
மனசு வேறுபாடு
உலக அழகிக்கும்
உள்ளூர் அழகிக்கும்
என்ன வித்தியாசம்?
மேக்கப் வித்தியாசம்.
தலைவர் தொடர்புக்கும்
தொண்டர் தொடர்புக்கும்
என்ன மாறுபாடு?
தொகுதி மாறுபாடு.
காதல் கனவுக்கும்
கல்யாணக் கனவுக்கும்
என்ன வேறுபாடு?
கயிறு வேறுபாடு.
வையவன்

ஒரு பெண் பிறந்தாள்

பிறந்தாள் ஒரு பெண்
அடுத்தடுத்து ஐந்தாறு பெண்கள்
பிறந்த பண்ணை வீட்டின்
நடைவழியில் அந்தியிருள்
சூழ்ந்த அரைக் கருநிழலில்
கூடியிருந்த கும்பல் விலக்கிப்
பேறு பார்க்கச்சென்ற மாது 
நிசி கழிந்து முகம் தொங்கி
திரும்பி வரக் கண்டு
கூட்டத்தில் நிசப்தம்.
அடுத்து அழுகுரல். பின் ஓர் ஓலம் 
மீண்டும் பிறந்தது ஒரு பெண் குழந்தை
பெண்ணுரிமை பெண் சமத்துவம்
பேசலாம் வீரமாய்
பிறந்ததும் திறக்கின்றன
அடைத்து மூட முடியாத
கவலையின் கதவுகள்
கறந்து காட்டியது காராம்பசு
இருந்தாலும் அன்று கடவுளுக்கு
கண் ஆஸ்பத்திரிக்கு வழி காட்டி
எல்லாப் பெண்களும்
வாயாரச் சபித்தார்கள்
வேறென்ன செய்வார்கள்?
எந்த இதிகாசம் அவர்கள்
வென்றதை நிரூபித்திருக்கிறது?
வையவன்