கூழுக்கும் கஞ்சிக்கும்

கூழுக்கும் கஞ்சிக்கும் 
கூழுக்கும் கஞ்சிக்கும்
கவிதை விற்று
நெஞ்சு நலிந்தது
தமிழ்ப்படைப்பு
இல்லாத கடவுளை
இருப்பதாய்க்கணக்கெழுதி
எண்ணிக்கை வளர்த்து 
கண்மூக்கு ஆயுதம் வாகனம்
கொடுத்துக்  கையிலே
ஜால்ராவொடும் தாளத்தோடும்
பக்திக் கிறுக்கில்
கோட்டை விட்டது நாட்டை

மையலுக்கும் உதட்டுக்கும்
முலைகளுக்கும் முயக்கத்திற்கும்
பண்டமாற்றம் செய்யமுனைந்து
பித்துப் பிடித்துப் பைத்தியமாகி
பரிகாசமே மீதி.தற்போது
குண்டும் பீரங்கியும்
கொலைவாளும் தீவட்டியும்
கோருகின்றன கைமாற்றம்

நீதி சொல்லிச் சொல்லி
நைந்தே போயிற்று பழஞ்சுவடி 

கடவுளாவது, காதல் கிளிகளின்
கொஞ்சுமொழிக்  கவிதையாவது !

கஞ்சிக்கும் கூழுக்கும்
வழியற்றோர் மன உலையில்

எரிகிறது தீ அடுப்பு